Үйлчилгээ

Далд оршоох

Уламжлалт ёсоор газарт оршуулах иж бүрэн үйлчилгээ: зөвлөгөө, бүртгэл, тээвэр, ёслол, хөшөө чулуу, цэцэрлэгт хүрээлэнгийн тохижилт хүртэл.

Утасдах · 7700-1234

"Нью-Семетри" ХХК нь 2006 онд анх үүсэн байгуулагдсан бөгөөд байгуулагдсан цагаасаа хойш оршуулгын үйлчилгээг олон улсын жишигт хүргэх, шинэ дэвшилтэт технологийг өөрийн орны уламжлалт зан үйлтэй хослуулан далд оршуулгын буяны үйлчилгээг иргэдэд нэн хүндэтгэлтэй, цогц байдлаар үзүүлж ирсэн.

Одоогоор "Нью-Семетри" ХХК нь Улаанбаатар хотын баруун зүгт Сонгинохайрхан дүүргийн 21 дүгээр хороо "Шүлэг уул"-ын энгэрт "Дурсгалын цэцэрлэгт хүрээлэн"-г, мөн Улаанбаатар хотын зүүн зүгт Төв аймгийн Сэргэлэн сумын 1-р баг "Баян уул"-ын энгэрт "Диваажингийн цэцэрлэгт хүрээлэн" бүхий далд оршуулгын газруудад үйл ажиллагаагаа явуулж байна.

Бидний үзүүлж буй буяны цогц үйлчилгээ

Далд оршоох үйлчилгээ нь ар гэрийн сонголт, ёслолын хэлбэр, оршуулгын газрын байршилд тохируулан дараах 9 төрлийн багц үйлчилгээтэй.

Хүндэтгэлийн тусгай үйлчилгээ
"Амгалангийн орон" тусгайлсан сектор бүхий хөшөөтэй үйлчилгээ
Том суваргатай багцын үйлчилгээ
Жижиг суваргатай багцын үйлчилгээ
Хөшөөтэй багцын үйлчилгээ (8-10 төрлийн хөшөө чулуу)
Гацуур модтой үйлчилгээ
Эко үйлчилгээ
Бунханы багцын үйлчилгээ
Чандарын хананы багц үйлчилгээ

Багц үйлчилгээнд багтах зүйлс

Сонгосон багцаас хамааран үйлчилгээний бүрдэл өөрчлөгдөж болох ч үндсэн багцуудад дараах бэлтгэл, ёслол, тохижилтын ажлууд багтдаг.

Хайрцаг сонголтоор (дотоодын эсгий лакан хайрцаг болон гадаадаас оруулж ирдэг Америк стандартын хайрцагнаас сонгох)
Шашны зан үйл (газар авах болон ёслолын өдөр газар дээрх зан үйл хийх ламын үйлчилгээ)
Бурхан болоочийг тээвэрлэх машины үйлчилгээ
Хүндэтгэлийн мандлын амьд цэцгийн үйлчилгээ
108 зулын үйлчилгээ
Бие ороох өнгөний дагуу ноосон хөнжил
Гар рашаалах үйлчилгээ
Бэлтгэл ажил (хөшөөний бичилт, суурилуулалт болон бусад)
Байнгын харуул хамгаалалт бүхий цэвэр орчин
Цаашдын зүлэгжүүлэлт, цэцэрлэгжүүлэлт, тохижилт

Дурсгалын цэцэрлэгт хүрээлэнд 2014 онд шинээр хүндэтгэлийн өргөө, олон улсын стандарт, технологийн дагуу хийгдсэн бунхан, төв асар хаалга, зулын өргөө болон гар рашаалах байр, засмал зам, зогсоол, гэрэлтүүлэг зэрэг бүтээн байгуулалтын ажил хийгдсэнээр танхим дахь ёслол хүндэтгэлийн үйлчилгээ багц үйлчилгээнд нэмэгдсэн.

Мөн 2015 оны 12 дугаар сараас эхлэн Нийслэлийн хэмжээний зөвшөөрөл бүхий Нарангийн энгэр, Өлзийтийн мааньт, Алтан-Өлгийн хүндэтгэлийн оршуулгын газруудад оршуулгын үйлчилгээг цогц байдлаар, илүү хямд үнэтэйгээр нэвтрүүлэн ажиллаж байна. Бид талийгаачдын ар гэрийнхэнд учирсан уй гашууг хуваалцан, буяны үйлчилгээг чанартай, түргэн шуурхай, цогц байдлаар үзүүлэхэд анхаардаг.

"Амгалангийн орон" төсөл

Диваажингийн бэлгэдлийг илэрхийлсэн Монгол түмний "оршоох" эртний уламжлалт сэтгэлгээг сэргээн, утга төгөлдөр бэлгэдлийг орчин үеийн ногоон байгууламжтай хослуулан Японы ногоон байгууламжийн OGATA DESIGN архитекторын бүтээсэн "Амгалангийн орон" төсөл нь Дурсгалын цэцэрлэгт хүрээлэнгийн хоймор хэсэгт байрлана. Энэхүү төслийн хэсэг бүр нь Монгол ахуйн бэлгэдлээр ялгарах онцлогийг харуулсан зохион байгуулалттай.

Байршил

Дурсгалын цэцэрлэгт хүрээлэнгийн Б сектор, 5400 м.кв талбай.

Ялгарах онцлог

Эртний монголчуудын оршоох зан үйлд нарт хорвоод үдлээд буцахын хооронд тухайн талийгаачийн аж төрсөн байдал, алдар гавьяа, бүтээсэн үйлс, ахуйн дэгээс хамаарч оршоох 7 төрлийн зан үйлийн хэлбэрийг бэлгэдсэн 7 үүд хаалгатай.
Төгсгөлгүй мөнх үргэлжлэх цагийн хэлхээг төлөөлсөн төв хэсэгтэй.
Хүмүүний амьдрал, ахуйг буулгасан 4 ханатай.
Элээж дуусах хувь тавилан, үхэх төрөхийн үнэний заагт орших хүмүүний амьдралын давтагдашгүй чанарыг илэрхийлсэн цагираган хэсгүүдтэй.
Байгальд ээлтэй хувилбараар газар зохион байгуулалтыг шийдсэн, 18 нэр төрөл бүхий нийт 8888 мод, бут, ногоон байгууламжтай.
Талийгаачийн дараагийн нүүдлийн унлага болон ар гэрийнхний буян хишгийг арвижуулахыг бэлгэдсэн 5 хошуу малын хэсэгтэй.
Хорвоод ирэхдээ нэгэн галд мэндэлж, нэгэн галд хураагдан мөнхөрдөг жамыг илэрхийлж, талийгаачийн арыг галын бурхдад даатган өргөх хэсэгтэй.
Эргэн мэндлэх зүг чигийг илэрхийлэх хүслийн модтой.
Уламжлал, ур шингэсэн дэр чулуутай.